အထီးကျန် ဌက်ငယ်- (၅)

နောက်နေ့ နံနက်စောစောအချိန်.......
ကျောင်းသွားရန် ထပ်ပြင်ဆင်နေသောကျနော်.....
မနေ့က စာမသင်ချင်သော ဆရာ ဒီနေ့တော့ စာတွေအများကြီး သင်ပါလိမ့်မည်အထင်နှင့်ကျောင်းသို့ ရင်ကော့ကာ ချီတက်ခဲ့၏.....
ကျောင်းသို့ရောက်သောအခါ....မနေ့ကတွေ့သောဆရာမှ
"အော်...မင်းလာပြီလား...သွား သွား...အပေါ်ထပ်ကိုတက်သွား....အဲ့မှာ ဆရာမတစ်ယောက်စာသင်နေလိမ့်မယ်...အဲ့ဒါမင်းတက်ရမယ့် အတန်းပဲ...."
သို့နှင့် ကျနော် အပေါ်ထပ်ရှိ စာသင်နေသော အခန်းထဲသို့ ဝင်လိုက်သည်နှင့် ကျနော်စိတ်ပျက်သွား၏....
အကြောင်းမှာ စာသင်နေသော ဆရာမမှာ အင်္ဂလိပ်မဟုတ်ပဲ အိန္ဒိယမှ ကုလားဆရာမဖြစ်နေသောသည်က တစ်ကြောင်း....နောက်တစ်ကြောင်းမှာ အတန်းထဲသို့ကြည့်လိုက်သည့်အခါ ကျနော်အပါအဝင် အတန်းထဲတွင် စုစုပေါင်းကျောင်းသား ကျောင်းသူ ၆ယောက်.....
ကျနော်ခုံတစ်ခုံတွင် ဝင်ထိုင်လိုက်သည်နှင့် ဆရာမက....
"အော်...ကျောင်းသားအသစ်နဲ့တူတယ်.....လာဒီအရှေ့မှာ မင်းအကြောင်းနဲ့ မင်းနိုင်ငံအကြောင်းလာထွက်ပြော......"
"ဗျာ...."
ဆရာမထိုသို့ပြောလိုက်သည်နှင့် ကျနော်အတော်စိတ်ပျက်သွား၏....
အကြောင်းမှာ ကျနော်လာတက်သည့် ဘာသာအမည်မှာ Business Management ဖြစ်ပြီး စာသင်သောအခါ ထိုဘာသာနှင့်ပတ်သတ်သည့်စာများ တစ်စွန်းတစ်စမျှ မသင်သောကြောင့်ဖြစ်၏.....
ထိုသို့ ဆရာမပြောခိုင်းသဖြင့် ကျနော်တတ်သလောက် မှတ်သလောက်ထွက်ပြောပြီး ၁နာရီခန့်အကြာတွင် စာသင်ချိန်ပြီးဆုံးသွားကြောင်း ကြေညာသဖြင့် ခေါင်းငိုက်ဆိုက်ကာ အိမ်သို့သာခြေဦးလှည့်ခဲ့တော့၏.....
အိမ်သို့ရောက်သောအခါ ဗိုက်ဆာ၍ထမင်းစားရန် ဆန်ကိုကြည့်လိုက်သောအခါ မလောက်တော့သည်ကို သိရသဖြင့် ကျနော့်အိမ်အနီးရှိ စတိုးဆိုင်တစ်ဆိုင်သို့ထွက်လာခဲ့၏......
ထိုဆိုင်ထဲသို့ရောက်သောအခါ ဆန်ရောင်းသည့်နေရာ ရှာမတွေ့...ကျနော့်စိတ်ထဲတွင်လဲ မြန်မာပြည်မှာ ဆန်ရောင်းသကဲ့သို့ အိုးဝိုင်းကြီးထဲတွင် ဆန်များထည့်ထားကာ လိုသလို ချိန်ရောင်းနေမည်ဟု သာစိတ်ထဲထင်၍ ရှာနေသောကြောင့် လုံးဝရှာမတွေ့.....
ရှာမတွေ့သည့် အဆုံး ဘေးနားမှဖြတ်သွားသော ဝန်ထမ်းတစ်ဦးအား....
"ဒီမှာခင်ဗျာ......ကျနော့်ကို ဆန်ရှိတဲ့နေရာလေး ပြပေးပါလား...."
ထိုသူမှာ ကျနော့်ငပိအသံကို နားမလည်သည်ထင့်.....ကျနော့်အား
"အော်..မင်းက ချက်ပြီးသားဆန်လိုချင်တာလား...မချက်ရသေးတဲ့ဆန်လိုချင်တာလား......"
သူပြောလိုက်သည်ကို ကျနော့်ရွှေုဥာဏ်တော် စူးရောက်ကာ သဘောပေါက်လိုက်သည်မှာ.....
"အော်..ဒီလူ ငါ့ကို ချက်လို့ရတဲ့ ဆန်လိုချင်လား....ချက်လို့မရတဲ့ ဆန်လိုချင်လားမေးတာဖြစ်မယ်..တောက်..ဒီကောင်ကွာ ...ဒါလေးတောင်မသိဘူး" ဟုပင်ထင်ကာ.....
"အော်...ချက်လို့ရတဲ့ ဆန်ပေါ့ဗျ......"
ထိုသို့ပြောလိုက်သည်နှင့် ထိုသူမျက်နှာကျနော့်အား ပြူံးပြကာ...
"အော်....ဟုတ်ပြီ...အဲ့ဒါဆိုရင် ဟိုးးးမှာတွေ့လား....ဆိုင်လေး..အဲ့ဒါ ကုလားဆိုင်...အဲ့မှာ ထမင်းရော ဟင်းရောရတယ်...သွား သွား....သွား...."
"ဗျာ......."
ထိုသူ အဲ့လိုပြောလိုက်မှ ကျနော်တွေဝေသွားကာ ခဏအကြာတွင်နားလည်လိုက်သည့် အသိတစ်ခုက....
"အော်...ဒီလူ ငါပြောတဲ့ ချက်လို့ရတဲ့ဆန်ဆိုတာကို ချက်ပြီးသားဆန်လို့နားလည်သွားတာကိုး...တောက်.. ချက်လို့မရတဲ့ ဆန်ရယ်လိုရှိလို့လား ငတုံးရဲ့ ..."
ဟူ၍တွေးမိကာ ကိုယ့်ကိုယ်ကို အပြစ်လဲတင် ရယ်လဲရယ်မိပြန်ပါသည်.....
အဲ့ဒီနောက် ထိုသူ့အား....
"အော်....ဆောရီး ဆောရီး ...ကျနော်ပြောတာ မချက်ရသေးတဲ့ဆန်ကို ပြောတာပါ"
ဟုပြောလိုက်မှ ထိုသူနေရာလိုက်ပြသောအခါမှ ကျနော်အင်မတန်လိုချင်လှသော ဆန်ကိုတွေ့လိုက်ရပါတော့၏.......
ဆန်ကိုထည့်ထားသည်မှာလဲ မြန်မာပြည်မှာကဲ့သို့ အိတ်ကလေးများဖြင့် မဟုတ်ပဲ လေးထောင့်ဘူးလေးဖြင့် ထုပ်ထားသောအထုပ်လေးများဖြစ်သောကြောင့် ကျနော်ရှာမတွေ့သည်ကိုလဲ အမှတ်ရမိပါသည်....
ဒီလိုနှင့် ဘဝကြီးက ပြီးသွားမည်လား......မဟုတ်သေးပါ......
ကျနော့်ဘဝ၏ အကြီးကျယ်ဆုံး ပထမဆုံး ပြဿနာ တစ်ခုပေါ်ပေါက်လာချေပြီ.....
ပြဿနာမှာ ဒီကစလေ၏....
မတောက်တစ်ခေါက်ကြိုးစားပြော၍ ရရှိလာသော ထမင်းလေးအား အားရပါးရစားပြီးတစ်ကာလ ဝမ်းတော်မှ အစွမ်းဖော်လာသဖြင့် အခြေတင်၍ပြေးရလေပြီ...
နားနှင့်မနာ ဖဝါးနှင့်နာဆိုသကဲ့သို့....ကျနော်ပြောရချေအုံးမည်....
အစဦးပိုင်းတွင် ကျနော်ဘာမှ သတိမထားမိသေး.....
ကိစ္စဝိတ်စပြီးသောအခါမှ ကျနော့်အထင်မြန်မာပြည်မှာ ကဲ့သို့ ဘေးဘက်တွင် ရေပိုက်ခေါင်းလေး တစ်ခုရှိမည် ဟုပင်တွေးကာ ဘေးဘီမကြည့်ပဲ လက်ဖြင့်လုိုက်စမ်းနေခုိုက်....မည်သည့်အရာမျှမထိမိ.....
သုို့နှင့် ခေါင်းလှည့်ကာရှာကြည့်လုိုက်တော့....ဘာဆုိုဘာမှမရှိ....
"ဟိုက်....."
ကျနော်သွေးငယ်ထိပ်ရောက်သွားပြီ...ဘာဆက်လုပ်ရပါ့.....ဒီအတုိုင်းကြီး  ပြန်ထွက်သွားပြန်လည်းမဖြစ်သေး..
ဘေးဘီဝေ့ကာ တစ်ရူး သို့မဟုတ် စက္ကူ အကူအညီတစ်ခုခုရလိုရငြား ရှာပါသော်လည်း....အချည်းနှီးသာ...
ဘာလုပ်၍ ဘာကိုင်ရမည်ကို မသိ....... နောက်ဆုံး အကြံတစ်ခုတော့ ရသွား၏......
သို့သော် ထိုအကြံကို အားတင်းကာ မရှက်မကြောက် လုပ်ရမည်ဖြစ်သည်.....
ထိုအကြံကား အကောင်းဆုံးနှင့် အထိရောက်ဆုံးဟု ကျနော်ယုံကြည်၍ အားတင်းကာ အကောင်အထည်ဖော်လိုက်သည်မှာ .......
ဘောင်းဘီလေးအား အသာဆွဲတင်.....အိမ်သာတံခါးအနီးသို့ လိပ်သွားနှုန်းဖြင့် တရွေ့ရွေ့သွားကာ တံခါးပေါက်နားရောက်သည်နှင့်.....တံခါးလေးအသာဖွင့် အပြင်သို့ခေါင်းလေးပျူ၍.......
"HELP ME!! HELP ME!! PLEASE!!! HELP ME!!!..."
ကျနော့်၏ လိပ်ခေါင်းထွက်မတက် အသံကြောင့် အိမ်ထဲရှိ လူ သုံးလေးယောက် အပြေးထွက်လာကာ ကျနော့်ကိုတွေ့သည်နှင့်......
"What's happening? "
ဟုမေးသောအခါ ကျနော် တံခါးပေါက်မှခေါင်းလေးပျူထွက်နေရာမှ  ရှိသမျှ သွား အကုန်ပေါ်အောင် ဖြီးပြကာ.....
"ဟီးဟီး....ကျနော့်ကို တစိတ်လောက် ကူညီပါလားဗျာ.....ကျနော့်ကို တစ်ရူးလေး နည်နည်းချည်းပါလားဗျာ.... ကျနော် အလွန်ဒုက္ခရောက်နေလို့ပါ ဒီအထဲမှာ......."
ဟုပြောလိုက်သည်နှင့် တပြိုင်နက် အားလုံး ကျနော့်အား ဝိုင်းရယ်ကြတော့၏.....
သူတို့ကတော့ ကျနော်သူတို့အား ရယ်စရာလုပ်ပြနေသည်အလား ထင်ကာ ရယ်နေကြသော်လည်း ကျနော့် စိတ်ထဲတွင် ကျနော့်အား လှောင်ရယ်နေသကဲ့သို့ပင် ခံစားရ၏.....သို့သော် အပြုံးမပျက်ခဲ့....သူတို့ရယ် သကဲ့သို့ ကျနော်လည်း လိုက်ရယ် ခဲ့မိ၏.....
သုို့နှင့် သူတို့ထဲက တစ်ယောက်အကူအညီဖြင့် ကျနော် အားလုံး အဆင်ပြေခဲ့သည် ဆိုကြပါဆို့ရယ်.....
ထိုဖြစ်ရပ်မှ ကျနော် သိလိုက်ရသည် ဗဟုသုတ တစ်ခုမှာ အင်္ဂလန်ရှိ အိမ်သာများတွင် ရေပိုက်ခေါင်း လုံးဝ မရှိ တစ်ရူးသာ သုံးကြသည် ဟူ၍ပင် ဖြစ်ပါတော့သည်........။



ဆက်ရန်....................

အထီးကျန် ဌက်ငယ်- (၄)

နံနက်စောစော  ၈ နာရီခွဲ......
ကျနော့်၏အခန်းထဲတွင် အပူစက်ဖွင့်ထားသောကြောင့်  အပြင်တွင်မည်မျှအေးနေသည်ကိုမသိ......
ကျောင်းသွားရန်  ဘောင်းဘီတိုတို.....စပို့ရှပ်လက်တို ကိုဝတ်ကာလွယ်အိပ်လေးလွယ်၍ကျောင်းသွားရန် ပြင်နေသော ကျနော်...
အပြင်သို့ထွက်ကြည့်လိုက်သောအခါ  လမ်းပေါ်တွင်လမ်းလျှောက်နေသောလူများမှာ ကုတ်အကျီထူထူများနှင့်  မာဖလာကြီးများဝတ်ကာ  လိုရာလမ်းသို့ ခပ်သုတ်သုတ်သွားနေသည်ကို မြင်သဖြင့်  ကိုယ့်ကိုယ်ကိုဂုဏ်ယူမိလိုက်၏.....
အကြောင်းမှာ သူများတကာတွေ  အနွေးထည်ထူထူဝတ်နေသောအချိန်တွင်  ကျနော်တစ်ယောက်တည်း ထူးဆန်းစွာဘောင်းဘီတို  အကျီတိုနှင့်ထွက်လာနိုင်သည်ကို  တွေးကာဂုဏ်ယူမိနေ၏.....
ကျောင်းသို့မနေ့က အန်တီကြီးလမ်းပြောပြထား၍  အနည်းငယ်မှတ်မိနေသောကြောင့်  ဖြေးဖြေးချင်းလျှောက်ကာသွားနေရာမှ  တစ်နေရာအရောက်....
"ဟာ.....တွေ့ပြီ....."
ဟုတ်ပါသည်..ကျနော့်ကျောင်းကြီုးကိုတွေ့လိုက်ပါပြီ......
ကျနော် ဝမ်းသာအားရစွာနှင့်ကျောင်းအပေါက်ဝသို့ပြေးသွားကာ  ကျောင်းထဲသို့ပြေးဝင်အခိုက်........
ဆိုဖာပေါ်တွင်  မိတ်မိတ်ကြီး အိပ်နေသော  အင်္ဂလိပ်လူမျိုးတစ်ဦး....
"ဟဲလိုစား.....ဂွတ်မောနီး"
ကျနော် ဦးစွာထိုသူ့အား  နှုတ်ဆက်စကားပြောလိုက်၏......
ထိုသူမှာ ကျနော့်အား မထင်မျက်မြင်ပုံနှင့် စောင်းကြည့်ကာ.....
"ဂွတ်အာဖတာနူး....."
တိန်.....
"ဗျာ....မောနီးဟုတ်ဘူးလား ခင်ဗျာ....."
ကျနော် တအံ့တသြမေးလိုက်ရာ  ထိုသူက...
"အင်္ဂလန်မှာ ၉ နာရီထိုးရင်  အာဖတာနူးလို့ပြောတယ်....."
ကျနော်အလွန်စိတ်ပျက်သွား၏......ကျနော်ငယ်ငယ်တုန်းကသင်ခဲ့သည့်တလျှောက် ဒါမျိုးတစ်ခါမှမကြားဖူးချေ......သို့သော်  သူ့အကြိုက်လိုက်ဆောင်ကာ.....
"အိုးးး...အိုကေ...အိုကေ.....ဂွတ်အာဖတာနူး"
ထိုသို့ပြောပြီးနောက် ထိုသူဆိုဖာပေါ်တွင်အိပ်နေရာမှ ထထိုင်ကာ.....
"ဘာလာလုပ်တာလဲ"
အတော်ဂွကျ သောမေးခွန်းမေးလိုက်သဖြင့် ကျနော်ဘာပြန်ဖြေရမှန်းမသိ၍.....
"ခင်.....ခင်ဗျာ......ကျောင်းး ..ကျောင်းလာတက်တာလေ....."
ထိုသူကျနော့်၏  အဖြေကိုသဘောကျဟန်မရသောမျက်နှာဘေးနှင့်ကျနော့်ကိုကြည့်ကာ......
"အေး...ဒါဆိုပြန်တော့..ငါ ဒီနေ့စာမသင်ချင်သေးဘူး...မင်းမပြန်ချင်သေးရင်လည်း အပေါ်ထပ်မှာ အင်တာနက်သွားသုံးလို့ရတယ်....."
ကျနော်အတော်စိတ်လေသွား၏.....စိတ်ထဲတွင်လဲ.....အော်...လတ်စသတ်တော့ သူကဆရာကိုး....မသိပါဘူး.....ကျောင်းစောင့်မှတ်လို့......
ကျနော်ဘာမှပြန်မပြောချင်တော့သဖြင့် အိမ်သို့သာပြန်လာခဲ့၏......
အိမ်သို့ပြန်ရောက်ပြီးနောက် မနက်စာအတွက် ထမင်းချက်ရန် luggage ထဲမှ မေမေထည့်ပေးလိုက်သော ထမင်းအိုးသေးသေးလေးကို ထုတ်ကြည့်လိုက်ရာ  ထမင်းအိုးထဲတွင် တခါစားရုံ ဆန်တစ်ဘူးခွဲလောက်ပါထည့်ပေးလိုက်သည်ကိုတွေ့လိုက်ရသဖြင့် အားရဝမ်းသာစွာ မီးဖိုချောင်ထဲဝင်၍ထမင်းချက်လေ၏.......
ဆန်ဆေးပြီးနောက် မေမေသင်ပေးလိုက်သည့်အတိုင်း ထမင်းတစ်ဘူး ရေတစ်ဘူးခွဲကိုမှတ်မိသွားသဖြင့် ရေနှစ်ဘူးခန့်ထည့်ပြီးနောက် ထမင်းစချက်ရန် မီးပလပ်ပေါက်ရှာပုံတော် ဖွင့်ရလေပြီ.....
မည်သည့်နေရာမှာမှ မီးပလပ်ပေါက်ရှာမတွေ့သဖြင့် နောက်ဆုံးနံရံပေါ်တွင်တစ်ခုတည်းရှိသော ပလပ်ပေါက်ကိုတွေ့၍ ဆွဲဖြုတ်လိုက်ရာ စောနကမပြောပလောက်သော ဆူညံသံလေးပျောက်သွားသည်ကို သတိထားမိလိုက်၏......ထိုအရာကို ကျနော်မသင်္ကာ၍  ထိုပလပ်ပေါက်တွင်ထိုးထားသော မီးကြိုးတစ်လျှောက်လိုက်ကြည့်လိုက်ရာ.......
ဟိုက်..သေဟ.......ရေခဲသေတ္တာမီးကြိုးကြီး.....
ကျနော်လန့်သွားသော်လည်း ဗိုက်ဆာလွန်းသဖြင့် ထမင်းအရင်ချက်ချင်သောကြောင့် မသိချင်ယောင်ဆောင်ကာ ကျနော့်ထမင်းအိုးမီးကြိုးလေးအားယူကာ  ထိုးမည်လုပ်အခိုက်.....
တောက်......မြန်မာပြည်ကဝယ်လာသောထမင်းအိုးဖြစ်သောကြောင့် မီးကြိုးမှာ တူးပင်ဖြစ်နေ၏...
အင်္ဂလန်ရှိ မီးပလပ်ပေါက်အားလုံး သရီးပင်ဖြစ်သည်ကို ယခုမှပင်သိတော့၏......
ကျနော်ဒေါသထွက်သွားကာ  ထမင်းအိုးချက်ရန် သရီးပင်နှင့်တူးပင်ဆက်ပေးသော မီးခေါင်းတစ်ခုသွားဝယ်ရန်ထွက်လာသောကျနော်....
ဆိုင်တစ်ဆိုင်သို့ရောက်သောအခါ
"တွေ့ပြီ......"
ကျနော်လိုချင်သော မီးခေါင်းလေးတွေ့သဖြင့် အားရဝမ်းသာစွာဝယ်၍ပြန်လာကာ ထိုးကြည့်ကာမီးခလုပ်ဖွင့်အခိုက်....
"ဖောက်...."
ပလပ်ပေါက်မှ အသံကျယ်ကြီးကြားလိုက်သဖြင့်ဘာဖြစ်မှန်းမသိဖြစ်နေ၏.....
ထို့နောက်ပလပ်ပေါက်ပြန်ထိုးကာ ဖွင့်ကြည့်လိုက်ရာ ထမင်းအိုးမှာ မီးပင်မလင်းတော့ချေ....
ထို့နောက်မကျေနပ်၍ အလားတူပလပ်ခေါင်း သွားထပ်ဝယ်ကာ ထပ်သုံးအခိုက်...
"ဖောက်....."
အသံကျယ်ကြီးထပ်ကြားရပြန်၏....
ကျနော်စိတ်ပျက်ပျက်နှင့် နီးစပ်ရာထိုင်ခုံတွင်ထိုင်ချလိုက်ပြီး ကျနော်ဝယ်လာသောမီးခေါင်းလေးကိုသေချာကြည့်လိုက်ရာ......အောက်နားတွင်ရေးထားသော စာလေးတစ်ကြောင်း.....
" Shaver Only"
တောက်.......
ကျနော်ရယ်ရမလို  ငိုရမလိုဖြစ်သွား၏.....
ထို့နောက် နောက်တခေါက်ဆိုင်သို့ထပ်သွားကာ သေချာကြည့်၍ဝယ်လာ၏...
အိမ်သို့ရောက်သောအခါမှ ဖွင့်ကြည့်လိုက်ရာ...
အိုကေ.....အဆင်ပြေသွား၏....ထမင်းစချက်နေသောအချိန်တွင် မေမေပေးထားသော ငါးပိကြော်လေးအားထုပ်ကာ စားရန်အဆင်သင့်လုပ်ထား၏....
အချိန်အနည်းငယ်ကြာသောအခါ....ထမင်းကျက်ပြီ......ဖြုတ်ထားသောရေခဲသေတ္တာမီးကြိုးကို အသာပြန်တတ်ကာ......
ကျနော်အားရဝမ်းသာစွာနှင့်ထမင်းစားရန်ပြင်အခိုက်  ထမင်းထည့်ရန် ပန်းကန်မရှိသည်ကိုသတိရလိုက်၏..
တောက်.....ဗိုက်ဆာနေသည်ဆိုမှ  အခုထိမစားရသေး....
ကျနော်မီးဖိုချောင်ထဲတွင် နှံ့နေအောင်ရှာသော်လည်း မည်သည့်ပန်းကန်မှမတွေ့....
ကျနော်စိတ်ပျက်ပျက်နှင့်ထိုင်နေစဉ်  မီးဖိုချောင်ထဲသို့ကျနော့်ဘေးအခန်းမှ လူတစ်ဦးထွက်လာ၏...
ထိုသူကိုကျနော်မေးကြည့်ရာ  ထိုသူက ဒီအိမ်မှာ ပန်းကန်တွေကို အပြင်မှာမထားကြောင်း..စားပြီကိုယ့်ပန်းကန်ကိုယ် အခန်းထဲမှာထည့်ထားကြောင်း (တနည်းအားဖြင့် ဝှက်ထားကြောင်း) သိလိုက်ရ၏
ထိုစကားကို ကျနော်ကြားလိုက်ပြီးနောက် ကျနော်ကောက်ချက်တစ်ခုချလိုက်၏...
အော်...တော် တော် အောက်တန်းကျတဲ့သူတွေ.......ငါတို့ဗမာတွေနဲ့များကွာပါ့.....
သို့သော် ထိုလူမှာ ကျနော်အားသနား၍လားမသိ.....သူ့အခန်းထဲရှိ သူ့ပန်းကန်တစ်ချက်ကိုကျနော့်အား လာပေးပြီး
"မင်းယူထားလိုက်...ငါက ပေါင်မုန့်ပဲစားတဲ့ကောင်...ပန်းကန်မလိုဘူး"
ဟုပြောသွားသောကြောင့် ကျနော်အားရဝမ်းသာစွာနှင့် ချက်ထားသောထမင်းနှင့် ငါးပိကြော်ကို မြိန်ရည်လျှက်ရည်စားလိုက်တော့၏......
နောက်နေ့နံနက်......ကျနော်ဖျားပြီ......
အဘယ်ကြောင့်ဆိုသော်  ကျနော်ဘောင်းဘီတို အကျီတိုနှင့် လူတကာမဝတ်သည့်အချိန်တွင်သွားဝတ်သောကြောင့်ဖြစ်တော့၏.........


ဆက်ရန်.......

အထီးကျန် ဌက်ငယ် - (၃)

မျက်နှာပေါ်သို့  အလင်းတန်းတစ်ခု  စူးကနည်းဝင်ရောက်လာသဖြင့်   မျက်လုံးပွတ်သတ်ကြည့်လိုက်ရာ  လေယာဉ်ပေါ်မှ  လေယာဉ်မယ်များမှာ လေယာဉ်ရှိပြတင်းပေါက်များလိုက်လည် ဖွင့်နေကြသည်ကို တွေ့လိုက်ရသဖြင့် ကျနော်စီးလာသောလေယာဉ်သည်  မကြာမီ London Heathrow လေဆိပ်သို့ ဆိုက်ရောက်တော့မည်ကို သိလိုက်ရ၏.......
ထို့နောက်  အနောက်သို့မှီလှဲထားသော  ထိုင်ခုံအားပြန်မတ်ကာ ဘေးဘီကြည့်လိုက်ရာ  ကျနော့်ညာဖက်မှ မျက်နှာနီနှင့်လူကြီးမှာ ကျနော့်အား မကျေနပ်သည့်သဖွယ် စောင်းကြည့်ကာ ကျနော့်အား......
"နိုးလာသေးတယ်နော်......."
ထိုလူပြောလိုက်မှ ကျနော်ရုတ်တရက် တွေဝေသွားကာ ခဏကြာစဉ်းစားလိုက်တော့.....
သြော်......ဟုတ်သားပဲ......လေယာဉ်မှ ကျွေးသော စားကောင်းသောက်ဖွယ်များကို အငမ်းမရစားသောက်ပြီး သကာလ ကာလနဂါးသဖွယ်  တစ်လမ်းလုံးအိပ်လာခဲ့ရာ  ထိုသူပေါ်အား ကျနော့်ခေါင်းဖြင့်  သွားသွားငိုက်ကျခဲ့သည်ကို  သွားသတိရလိုက်၏......
"ဟိုက်.....သေဟ......ဒါကြောင့်သူ ငါ့ကို မျက်ဒေါက်နီကြီး နှင့်ကြည့်နေတာကိုး......."
ကျနော် ကိုယ့်ကိုယ်ကို ပြောမိလိုက်၏.....နောက်မှ ထိုသူ့အား မျက်နှာချိုသွေးကာ.........
"ဟီး.....ရပ်စ်...ရပ်စ်.....အိုင်အမ် ဆောရီး....အိုင်စလိ  အောသဝေး......ဟေးဟေး....ဆောရီး...."
မတောက်တစ်ခေါက်လေသံဖြင့်  သွားပြောလိုက်တော့မှ  ထိုသူကြီး မျက်နှာနည်းနည်း စိတ်ပြေသွားသည်ထင့်.....ခေါင်းတစပ်စပ်ငြိပ်ကာ......
"ဝဲ အားယူ ခမ်းဖရွမ်....."
တည်ကြည်ပြတ်သားသော အင်္ဂလိပ်လေသံဖြင့် ကျနော့်အားမေးလိုက်၏.....
ကျနော်ကလည်း  အားကျမခံ
"အိုင် ခမ်းဖရွမ်  မြန်မာ....အော်....ဘားမား....."
ဘယ်လောက်ကြိုးစား ပြောသော်လည်း  ကျနော့်ငပိလေသံကို ပြင်၍မရ......
သို့သော် အားတက်စရာပင်....ကျနော်ပြောသည်ကို ထိုသူ ကောင်းကောင်းနားလည်၏....ထို့နောက်...
"အိုး....အိုိင်စီး"
ခေါင်းတစပ်စပ်ငြိပ်၍ ပြန်ပြောလေ၏။
ကျနော့်မှာ သူ့ပါသူ  အိုင်စီးစီး....ချောင်းစီးစီး.....တစ်လမ်းလုံးအိပ်လာသောကြောင့် အပေါ့အပါးပင် မသွားရသေးသဖြင့်  အလျှင်အမြန်ထကာ  နီးရာအိမ်သာသို့  ပြေးခဲ့ရ၏.......
ကျနော့် ထိုင်ခုံသို့ ပြန်ရောက်သည်နှင့်  များမကြာမီ  လေယာဉ်မယ်များ  စတင်၍ မနက်စာ ဧည့်ခံနေသည်ကို တွေ့လိုက်ရသဖြင့်  အားတက်သွားကာ အရှေ့ရှိ Menu ကိုလှမ်းယူကာ ကြည့်လိုက်တော့
ဘာတွေရေးထားမှန်းမသိ......ရေးထားသမျှတွင် ကျနော်နားလည်သော စာလုံးများမှာ.....
(Potato, Tomato).......
"ဟိုက်....နိပ်ဟ....."
ကျနော် စိတ်ထဲ အတော်စိတ်ညစ်သွား၏....အကြောင်းမှာ သူတို့တွေ Serve လုပ်သည့်စားစရာများကို နားမလည်၍ ဖြစ်၏...
သို့သော်.....ကျနော်၏ ဘေးမှ မျက်နှာနီနှင့်လူကြီးအရင်မှာသည်ကိုစောင့်ကာ  သူစားသည့်အတိုင်း လေယာဉ်မယ်အား လက်ညှိုးထိုးပြလိုက်ရာ  ကျနော့်ထံသို့  ခဲပတ်ဖြင့်ပတ်ထားသောပန်းကန်လေး နှင့် သစ်သီးစုံများထည့်ထားသော ဗန်းလေးရောက်လာ၏....
ကျနော်ရှေ့သို့ စားစရာများရောက်လာသည်နှင့် ဆိုလျှင်ပင် အားပါတရစားမည်ဟုကြံကာ ဖွင့်အကြည့်....
"တောက်.....ဘာများလဲလို့ကွာ......ကြက်ဥမွှေကြော်ကြီးကိုး....."
ကျနော်အတော်စိတ်လေသွား၏....ကျနော့်ဘေးမှလူကြီး ကိုကြည့်လိုက်ရာ ခရင်း နှင့် ဓားကိုကျွမ်းကျင် ပိုင်နိုင်စွာ ကိုင်လျှက် မြိန်ရည်လျှက်ရည် စားနေသည်ကိုတွေ့လိုက်ရ၏.....
ကျနော်မှာ မကြိုက်သော်လည်း ဗိုက်ဆာနေသဖြင့် သည်းခံပြီးစားလိုက်ရာ ဗန်းပေါ်မှစားစရာများ တစ်ခုမှမကျန်တော့ပေ......
သို့နှင့် နာရီအနည်းငယ်မျှကြာသော အခါ လေယာဉ်မှ လေယာဉ်မှူးက မိုက်ခရိုဖုန်းဖြင့်......
"Good Morning Ladies and Gentlemen.....We are now approaching to London Heathrow Airport.....The local time is 7:00am......"
လေယာဉ်မှူး၏ Announcement ကိုကြားလိုက်ရသည်နှင့် တပြိုင်နက်  လေယာဉ်ဆင်းတော့မည်ကို သိသဖြင့်  သူများတွေထက် ဦးအောင်ထိုင်ခုံရှိ ခါးပတ်ကိုတင်းကြပ်စွာ ချည်နှောင်ကာ ဘေးနှစ်ဖက်ရှိလက်တန်းများကို တင်းကြပ်စွာ ဆုပ်ကိုင်ထား၏....
တဖြည်းဖြည်းနှင့် လေယာဉ်ကြီးသည် တိမ်အထက်ထက်ကို ဖြတ်ကျော်ကာ မြေပြင်နှင့် အတော်နီးကပ် လာခြေပြီ.....
"ဒုံး"
လေယာဉ်ကြီးမြေပြင်ပေါ်သို့အောင်မြင်စွာ သက်ဆင်းသွား၏.....
သို့နှင့် ကျနော်အပါအဝင် လူများအားလုံးလေယာဉ်ပေါ်မှဆင်းရင်စောင့်နေခိုက် ကျနော့်ဘေးမှ မျက်နှာလူကြီးနှင့်လူက ကျနော့်အား နှုတ်ဆက်စကားဆို၏....
"ဂွတ်လပ်ခ် မိတ်...."
သူဘာကိုဆိုလိုသည် မသိ....သို့သော်ယဉ်ကျေးမှုအရ ကျနော်လောကွတ်ပြုလိုက်၏...
"သိုင်းကျူး...."
လူစုကြီးများတရွေ့ရွေ့သွားသည့်လမ်းအတိုင်းလိုက်ခဲ့ရာ တစ်နေရာအရောက်တွင် များပြားလှသောလူများ အင်မီဂရေးရှင်း ကိုဖြတ်ရန်စောင့်နေသည်ကို တွေ့လိုက်ရ၏.....
များမကြာမီကျနော့်အလှည့်သို့ရောက်သောအခါ အင်္ဂလိပ်လူကြီးတစ်ဦးမှ ကျနော့်အား...
"မင်း အခုမှ အင်္ဂလန်ကိုလာတာလား....."
ကျနော်မှာ ကြောက်ကြောက်နှင့်ပြန်ဖြေလိုက်၏...
"ဟုတ်...."
ထို့နောက် ထိုလူမှာ
"အေး...ဒါဆို ဒီကိုလာ....မင်းပစ္စည်းတွေဒီမှာ ခဏထား.....ပြီးရင်ဟိုရှေ့က အခန်းထဲမှာ  အကျီင်္ချွတ်ပြီး စောင့်နေ......."
ကျနော့်သွေးခုန်နှုန်းမှာ ငယ်ထိပ်သို့တက်စောက်တော့မည့်အလား  အတော်ကိုပင်ကြောက်သွားကာ ထိုလူကြီးအား  ကြောက်အားတစ်ငင် အသံတုန်ရင်စွာဖြင့်.......
"ဟင်းးးးးးးးးး.....ခင်...ခင်ဗျာ.....ကျ...ကျနော် စာလာသင်တာခင်ဗျ......."
ကျနော့်စကားကိုကြားသော  ထိုလူကြီးမှာ  ကျနော့်ရှေ့တွင် ခွက်ထိုးခွက်လန် ရယ်လေ၏......
ထို့နောက် သူရယ်လို့ဝသွားသည့်နောက် ကျနော့်အား....
"ဟားဟား...မင်းကိုငါဘာပြောသေးလို့လဲကွ....ဟိုအခန်းထဲမှာ မင်းကိုဓာတ်မှန်ရိုက်...ဆေးစစ်မလို့ အကျီင်္ချွတ်ခိုင်းတာကွ....ဟားဟား...မင်း တော်တော်ရယ်ရတဲ့ကောင်...သွားသွား...ဟိုမှာစောင့်နေ...."
ထိုလူ ပြောသည့်စကားကြောင့်ကျနော့်ရင်ထဲရှိ အလုံးကြီးကျသွား၏...
"ဟူး.....တော်ပါသေးရဲ့.....မဟုတ်ရင် ငါထင်တာမှန်တယ်....."
ကျနော့်စိတ်ထဲ ထိုသို့တွေးမိ၏.....
နာရီအနည်းငယ်မျှကြာသောအခါ ဆေးစစ်...ပတ်စ်ပို့ချက်ခ်ကိစ္စများအားလုံးပြီးသွားပြီးနောက် ကျနော့်လက်ဆွဲအိပ်ကိုဆွဲကာ   ဘဝကြီးကိုရဲရဲတင်းတင်း ရင်ဆိုင်မယ်ဟုဆုံးဖြတ်ကာ ထွက်ပေါက်အတိုင်း လျှောက်လာအခိုက်.....
လာကြိုသောလူများကြားထဲ  ကျနော့်အားလာကြိုမည့်သူကို သည်းကြီးမဲကြီးရှာရလေပြီ....
တွေ့ပြီ.....
မြန်မာ-တရုတ်စပ် ပုတုတုအမျိုးသမီးတစ်ယောက်ကျနော့်အား လက်လှမ်းပြကာ....
"တား....စွဲ..စွဲ...အန်တီဒီမှာ...."
ကျနော်အတော် စိတ်ပိန်သွား၏.....အကြောင်းရင်မှာ ကျနော့်နာမည် ဇွဲကို သူခေါ်ခါမှ (စွဲ) ဖြစ်သွားသောကြောင့်ဖြစ်၏။
ထို့နောက်ထိုအမျိုးသမီးမှာ ကျနော့်အား
"အမလေး စွဲရယ်....အန်တီစောင့်နေတာကြာလှပီ...မရောက်တော့ဘူးလို့တောင် ထင်နေတာ...တော်ပါတေးရဲ့....လာလာ..စွဲပေး...အန်တီကိုပေး....."
ထိုစကားကြောင့် ကျနော်မျက်လုံးပြူးသွား၏......သို့သော် ထိုအမျိူးသမီးမှာ ပြောပြောဆိုဆိုနှင့် ကျနော့်လက်ဆွဲအိတ်ကို ဆွဲယူလိုက်သဖြင့် ကျနော်ပြူးနေသော မျက်လုံးများ ပြန်ပြေသွား၏...
ထိုနောက် ထိုအမျိုးသမီးက...
"တား..လာ အန်တီ KFC လိုက်ကျွေးမယ်...ပြီးရင် တားနေမယ် အိမ်ကိုပို့ပေးမယ်...."
ထို့နှင့် ကျနော်တို့ နေ့လည်စာကို KFC ဆိုင်တွင်စားပြီးနောက် ကျနော့်အား ကျနော်နေမည့် အိမ်သို့ပို့ပေး၏.
ကျနော်နေမည့်နေရာကို ကျနော့်အား မြေအောက်ရထားဖြင့် ခေါ်သွားကာ ထိုနေရာ အရောက်တွင် ထိုအမျိုးသမီးမှာ လူတစ်ဦးအား ဖုန်းဆက်ကာ လာခေါ်ခိုင်းနေကြောင်းကြားလိုက်ရသဖြင့် ကျနော်သူ့အား
"အန်တီ..ဘယ်သူ့ကို ခေါ်နေတာလဲ"
"တား နေမယ့် အိမ်ရဲ့ အိမ်ပိုင်ရှင်ကို လေ..သူလာခေါ်ပြီး လိုက်ပြလိမ့်မယ်..."
"သြော်...ဟုတ်...."
အချိန်အနည်းငယ်ကြာသောအခါ ကားတစ်စီး ရောက်လာကာ ကျနော်တို့ ကားပေါ်တက်လိုက်ခဲ့၏...
တစ်နေရာ အရောက်တွင် ထိုကားမောင်းသူမှာ ဟိုကြည့် ဒီကြည့် နှင့် ဒုက္ခရောက်နေပုံပေါက်နေ၏...ထိုအရာကို မြင်သော အန်တီက ထိုကားမောင်းသူအား လှမ်းမေးလိုက်၏...
"ရှင် ဘာရှာနေတာလဲ......"(တရုတ်-အင်္ဂလိပ် လေသံဖြင့်)
ထိုကားမောင်းသူ၏ အဖြေကို ကျနော်ကြားလိုက်သည်ဆိုလျှင်ပင် အနီးရှိဓာတ်တိုင်နှင့်ခေါင်းနှင့် ပြေးဆောင့် ချင်စိတ်ဖြစ်သွား၏...ထိုသူဖြေလိုက်ပုံမှာ....
"ငါ ငါ့အိမ်လိုက်ရှာနေတာပါ......."
တောက်....သူတောင်သူ့အိမ် လိုက်ရှာနေရရင် ငါနေရင် အိမ်တောင်ပြန်ရောက်ပါ့မလားမသိဟူသော အတွေးကြောင့် ကျနော် အတော်စိတ်ပျက်သွား၏.......
ခဏအကြာ....
"ရက်စ်.....ရှာတွေ့ပြီကွ...."
ကားမောင်းသူ၏  တက်ကြွလှသော အသံ...
ထိုလူ သူ့အိမ်သူ ရှာတွေ့ရှာတွေ့သဖြင့် ကျနော့်အထုပ်များကိုချကာ သူခေါ်သွားသည့် အခန်းကို လှမ်းအကြည့်.......
"တောက်.......ဒါပဲလား အခန်းက....."
ကျနော် စိတ်ပျက်ပျက်နဲ့ထိုလူအားမေးလိုက်၏....
"အေးလေ..ဒါတစ်ယောက်အခန်း...ဒီမှာသော့.."
ကျနော်အတော်စိတ်ပျက်သွား၏...အကြောင်းမှာ သူပြသော အခန်းမှာ ကျနော့်အိမ်အခန်းမှ အိမ်သာမျှသာရှိနေသောကြောင့်ဖြစ်၏.......

ဆက်ရန်..........